Պեսկովը հիշեցրել է արցախյան պատերազմը դադարեցնելու գործում Պուտինի անձնական ներդրման մասին
ՌԴ նախագահ Վլադիմիր Պուտինի մամուլի քարտուղար Դմիտրի Պեսկովը շեշտել է, որ բոլորը պետք է հիշեն ՌԴ նախագահի անձնական դերը Լեռնային Ղարաբաղում պատերազմի դադարեցման գործում:
Այս մասին Պեսկովը նշել է «Արգումենտի ի ֆակտի» պարբերականի հետ հարցազրույցում:
Նրա խոսքով, Ռուսաստանը լավ հարաբերություններ ունի ինչպես Ադրբեջանի, այնպես էլ Հայաստանի հետ:
«Մենք Ադրբեջանի հետ հիանալի վստահելի հարաբերություններ ունենք՝ հիմնված փոխադարձ հարգանքի վրա. դրանք կարող են ունենալ շատ ու շատ կողմեր, որոնք փոխշահավետ են:
Հայաստանի հետ նույնպես պատմականորեն լավ հարաբերություններ են. մենք ունենք մեծ թվով ինտեգրացիոն գործընթացներ, որոնք Հայաստանին բերում են ինչպես քաղաքական, այնպես էլ տնտեսական զգալի օգուտներ»,- ասել է նա:
Հիշեցնենք, որ 2020 թվականի նոյեմբերի 9-ին Ռուսաստանի նախագահ Վլադիմիր Պուտինը, Ադրբեջանի նախագահ Իլհամ Ալիեւը եւ Հայաստանի վարչապետ Նիկոլ Փաշինյանը համատեղ հայտարարություն ստորագրեցին Լեռնային Ղարաբաղում ռազմական գործողությունների ամբողջական դադարեցման վերաբերյալ: