Այո՛, ապագա կա… Ապագա կա առանց կապիտուլյանտների
Մղձավանջը շարունակվում է … ամեն պահ, անընդհատ…
Ադրբեջանական զինուժը Վարդենիս-Քարվաճառի շրջանից այսօր գերեվարել է 6 հայ զինծառայողի:
Հասկանո՞ւմ եք՝ ինչ է կատարվում: Հակառակորդը ներխուժել է մեր երկրի սուվերեն տարածք, թշնամին շաբաթներով այստեղ է, սկսել է շինարարական-ինժեներական աշխատանքներ իրականացնել և գերեվարել է 6 զինվորի:
Որտե՞ղ է մեր պետությունը, որտե՞ղ են մեր իշխանությունները: Արդյո՞ք այս ապագայի մասին են քարոզում: Սա՞ է ձեր խոստացած ապագան:
Նոյեմբերի 9-ի կապիտուլյացիոն պայմանագրից հետո ամիսներ են անցել: Ինչու՞ չունենք կահավորված առաջնագիծ: Ինչու՞ մեր սահմանները ամուր ու կայուն չեն:
Մայիսի 20-ին կառավարության նիստի ժամանակ, պրն. Փաշինյան, հայտարարել եք, որ պատրաստ եք ստորագրել Ադրբեջանի հետ նոր պայմանագիր, մեջբերում եմ.
«Այո, ես այդ թուղթը ստորագրելու եմ, քանի որ դա 100 տոկոսով համապատասխանում է Հայաստանի շահերին»,
Արդյո՞ք սա է Ձեր պատկերացրած ապագան հայ ժողովրդի համար:
Դուք և Ձեր թիմը սպառել եք Ձեզ: Ժամանակն է հեռանալու: Բավական է սեփական մեղքը գցել այլոց վրա: Հեշտ է մեղադրել նախկիններին իրենց արածի կամ չարածի համար: Սակայն ժամանակն է գիտակցելու սեփական մեղքերը ու հեռանալու:
Ռուսաստանը կամ ՀԱՊԿ-ը չէ, որ պետք է մեզ պաշտպանեն, առաջին հերթին մենք ինքներս պետք է մեզ պաշտպանենք:
Աննա Աթաբեկյան
